Gazetarja Alba Kepi, në një intervistë për Fax News, ka folur mbi procesin e regjistrimit të diasporës për zgjedhjet parlamentare të 11 majit 2025. Ajo e cilësoi këtë proces si një sukses, duke theksuar se numri i regjistrimeve ka arritur në rreth 230.000, ndërsa 22.320 kërkesa janë refuzuar.
Sipas Kepit, Italia mban rekordin për numrin më të madh të aplikimeve, me mbi 52.000 kërkesa, por shifra mund të kishte qenë edhe më e lartë. Ajo kritikoi sistemin autokratik të administrimit të të dhënave në Shqipëri dhe mungesën e respektimit të normave europiane për privatësinë, çka sipas saj ka ndikuar në mosangazhimin e shumë emigrantëve në këtë proces.
Gjithashtu, gazetarja theksoi se ky regjistrim është rezultat i punës së opozitës, veçanërisht Partisë Demokratike, duke e krahasuar me dështimin e regjistrimit të diasporës në procesin e censusit tre vite më parë, ku u regjistruan vetëm 12.000 shqiptarë. Kepi vuri në dukje se gjatë këtij procesi ka pasur sfida dhe problematika, veçanërisht në Itali, ku partitë politike kanë zhvilluar takime të shumta për të nxitur pjesëmarrjen e emigrantëve në votime.
Discussion about this post