Alban Hoxha, kapiteni i Partizanit, është i pakënaqur që nuk u zgjodh të ishte titullar në ndeshjen e kombëtares shqiptare ndaj Italisë, por respekton vendimin e trajnerit duke thënë se Strakosha ka përparësi duke qënë se luan në një kampionat të fortë si Seria A.
Ai shpreson që të zgjidhet titullar në ndeshjen e qershorit ndaj Izraelit, ndërsa pranon se trajneri De Biazi nuk i dha sqarime për zgjedhjen e bërë.
Në konferencën e sotme për shtyp në kuadër të ndeshjes ndaj Skënderbeut në Kategorinë Superiore, portieri i Partizanit tha se ajo ishte zgjedhje e trajnerit.
“Të gjithëve u vjen keq sepse të gjithë duan të luajnë, por s’mund të bëhet tragjike pse nuk luajta. Këto janë zgjedhje të trajnerit. Unë e kam thënë që jam i kënaqur që jam pjesë e kombëtares dhe kjo ka rëndësi për mua”, tha Hoxha.
Për zgjedhjen e Strakoshës nga ana e De Biazit, Alban Hoxha tha:
S’di çfarë të them, kjo është zgjedhje e trajnerit. Ai e shikon me sy tjetër. Normalisht që një 29-vjeçar me një 19-vjeçar janë ndryshe, por ai luan në kampionat më të fortë dhe kjo besoj i ka dhënë më shumë përparësi ndaj meje, por De Biazi nuk më sqaroi fare. (M.D/ Shuplaka)
