Portieri i Kombëtares Shqiptare Alban Hoxha bëhet gati që t’i japë lamtumirën skuadrës së Partizanit.
Transferimi drejt Kampionatit Italian ka qenë një nga ëndrrat e hershme të portierit. Sipas mediave italiane, portieri është shumë pranë firmës me një prej klubeve që u ngjitën në këtë sezon në elitën e futbollit italian.
Bëhet fjalë për SPAL, klubin e qytetit të Ferrarës, të cilin në fillimet e karrierës së tij si trajner, e drejtoi për dy sezone edhe Xhani De Biazi. SPAL është ngjitur në elitën e futbollit italian pas nëj sezoni mbresëlënës në Serinë B, por tani kërkon një portier cilësor, duke llogaritur se nuk ka garancinë se do të mbajë të riun Meret që e kishte në huazim nga Udineze.
Transferimi i Hoxhës, sipas “Calciomercato.it”, është pranë finalizimit për shifrën e 200 mijë eurove. Me sa duket portieri dhe Partizani kanë ulur ndjeshëm pretendimet, pasi një vit më parë, kur atë e kërkonin klubet turke, kërkonin shifra shumë të larta për të mundësuar transferimin.
(E.K/SHUPLAKA)
