Ish-kreu i bandës së Lushnjes, Alfred Shkurti, i njohur ndryshe si Aldo Bare, ka kërkuar prishjen e dënimit “burgim përjetë”. Mësohet se ai ka trokitur në Gjykatën Kushtetuese për të kërkuar prishjen e këtij dënimi dhe shpalljen antikushtetuese të 4 vendimeve të drejtësisë shqiptare.
Pritet që më 31 janar 2017, avokati i tij të paraqesë pretendimet se përse duhen prishur vendimet e dhëna ndaj tij.
Ai u dënua fillimisht në 2011-ën me burgim të përjetshëm, vendim që ai e ankimoi dhe pasi është rikthyer për gjykim me një tjetër kolegj penal përfundimisht është lënë në fuqi, dënimi, ‘burg përjetë’.
Aldo Bare u dënua me “burg përjetë” 5 vite më parë për kryerjen e 4 vrasjeve, mes tyre dhe të Artur Dajës me të cilin banda e tij u konfliktua gjatë viteve ‘97 pasi këta të fundit i vranë vëllain.
Ai akuzohet edhe për krime të tjera si “vrasje e mbetur në tentativë”, “krijim i organizatës kriminale”, “armëmbajtje pa leje”.
Ai u ekstradua në Shqipëri më 25 nëntor nga Turqia, pasi u arrestua për llogari të drejtësisë shqiptare. (XH.A/SHUPLAKA)
