Trupat qeveritare siriane janë duke korrur sukses në Aleppo-n e shndërruar në një vatër lufte. Bëhet me dije se si rezultat i këmbënguljes së ushtrisë vendase, janë çliruar mbi 70% e zonave në lindje, të cilat kontrolloheshin nga rebelët.
Pretendimet qeveritare nuk janë verifikuar ende, por raportet flasin për lirimin e lagjeve të tëra në rrethet Sheikh Lufti dhe Marja.
Megjithatë, më shumë se 100.000 njerëz mendohet se janë ende të bllokuar, në duart e rebelëve, në një kohë kur furnizimet ushqimore kanë mbaruar dhe spitalet kanë dalë jashtë funksionit.
Gjatë të martës, Rusia akuzoi Shtetet e Bashkuara të Amerikës se po përpiqet të fitojë kohë për rebelët në Aleppo. Ministri i Jashtëm rus, Sergei Lavrov tha se SHBA-të kishin zhvilluar bisedime të paplanifikuara që kanë në qendër një tërheqje të mundshme të rebelëve.
“Duket si një përpjekje për të fituar kohë për rebelët, me qëllim që të ketë një pushim gjatë të cilit ata do të plotësojnë rezervat e tyre.” tha ai. Ky pretendim u hodh poshtë nga Sekretari amerikan i Shtetit, John Kerry.
