Pas Bushatit, Ministri i Jashtëm italian, Angelino Alfano vizitoi presidentin e Republikës Bujar Nishani. Gjatë takimit, Nishani shprehu mirënjohjen e Shqipërisë dhe shqiptarëve për ndihmën e madhe e shumë dimensionale që Italia dhe populli italian i kanë dhënë, veçanërisht pas viteve ’90, për rimëkëmbjen ekonomike e sociale të vendit, pas dekadash izolimi nga diktatura.
“Marrëdhëniet dhe lidhjet mes dy vendeve tona janë sa historike aq edhe kulturore, dhe partneriteti ynë strategjik i ka të gjitha mundësitë dhe hapësirat për t’u zhvilluar dhe pasuruar më tej, si në nivel dypalësh ashtu edhe në atë evropian”, tha Nishani.
Lidhur me integrimin e Shqipërisë në BE, Nishani u shpreh se mbetet projekti strategjik më madhor i shqiptarëve. Sipas tij, Italia është treguar një nga avokatet më të mira të Shqipërisë në këtë proces.
Madje, ai e cilësoi vizitën e Alfanos në Shqipëri si shprehje e vëmendjes së lartë që Italia i ka kushtuar rajonit. (D.D/Shuplaka)
Discussion about this post