I ftuar ditën e sotme në studion e Faxnews, ishte analisti Neritan Alibali, i cili u ndal të fliste rreth tensioneve në veri të Kosovës, ku qytetarët sebë kanë kundërshtuan emërimin dhe marrjen e detyrës nga kryetarët e zgjedhur.
Alibali tha se nisja por edhe më tej përshkallëzimi i këtyre tensioneve ka ardhur si pasojë e urdhrave nga Beogradi zyrtar, ku dhe nuk mohoi pjesëmarrjen e Vuçiç-it në këtë akt aspak paqësor. Sipas analistit, presidentit serb i leverdisin politikisht këto tensione, ku edhe po i shfrytëzon për të fituar mbështetjen e serbëve në Kosovë, aq më shumë tani që dha dorëheqjen nga partia dhe po afrojnë zgjedhjet.
“Për presidentin Vuçiç lëvizjet në Veri të Kosovës janë një fabul e mirë për të rritur mbështetjen e tij elektorale dhe politike tek serbët e Kosovës. Fakti që pikërisht në një moment të tillë presidenti bën një lëvizje politike që jep dorëheqjen nga pozicioni i kryetarit të partisë së vetë ndërkohë që opozita ka bërë mitingje të fuqishme, tregon që e gjithë kjo lëvizje është gatuar në një pjesë të madhe në zyrën e tij. Fakti që Komiteti Ndërkombëtarë sa herë që ka lëvizje agresive ose turbullim i sigurisë në Veri, nuk i drejtohen serbëve lokal, por presidentit Vuçiç tregon se ka një organizimin të këtyre lëvizjeve nga vetë zyra e tij”, tha Alibali.
Më tej, ai komentoi se përsa i përket ecurisë së veprimeve, ato do të vijë duke u zbehur kjo pasi edhe ndërkombëtarët janë futur më mesin e tyre. Alibali theksoi se nëse serbët do t’i përshkallëzonin këto tensione, ky do të ishte një autogol për ta, pasi do shkojnë kundër vullnetit të instancave të larta evropiane të paqes.
Sakaq, Alibali u ndal gjithashtu edhe tek vendimi i anulimit të stërvitjes dhe aktiviteteve të ‘DEFENDER 2023’, ku e cilësoi me të vërtetë një lajm të keq, ndërkohë që ende nuk dihet qartë nga ka ardhur ky vendim.
“Ne duhet të kemi një gjë parasysh. Për komunitetin ndërkombëtar gjëja më e rëndësishme është zbatimi i marrëveshjes së Brukselit dhe i aneksit të Ohrit. Edhe pse nuk janë firmosur nga palët, janë zotuar se do ti ndjekin për rrugën e tyre të integrimit në institucionet evropiane. Unë mendoj se të dyja palët do të tërhiqen, në dijeninë time protestuesit kanë marrë urdhër nga Beogradi për të mos qenë aq agresiv sa ishin dje, sepse nëse deri dje veprimi i forcave të policisë konsiderohej si autogol i Kurtit, sot dhuna që serbët përdorën ndaj policisë dhe trupave të KFOR-it, i ka kaluar autogoli atyre. Besoj se të dyja palët do të tërhiqen pas, kjo edhe për shkak të presionit të ndërkombëtarëve. Për aq kohë sa edhe ambasadori amerikan kërkoi që kryetarët e zgjedhur mos ta ushtrojnë detyrën e tyre nga zyrat, kjo do të sjelli edhe normalizimi të situatës së krijuar. Për mua sot lajmi më i trishtë ka qenë anulimi i stërvitjeve të ‘Defender 2023’ në kudër të NATOS. Nuk e dimë nëse pezullimi ka qenë kërkesë e amerikanëve, apo ka ardhur thjesht nga tensionet por është me të vërtet një lajm i keq”, shtoi më tej ai.
