Lefter Alla prej dy ditësh është emri më i lakuar në çdo media apo portal, edhe pse drejton një qytezë të vogël si Bulqiza, me interesa të jashtëzakonshme për nëntokën e saj, e ku kryqëzohen fatet e shumë biznesmenëve.
Fakti është i thjeshtë: Gazetari Artan Hoxha pas disa paralajmërimeve për ekzistencën e saj, publikoi një video në të cilën Alla shihej duke konsumuar kokainë në ambientet e një lokali.
Të paktën ky është pretendimi i gazetarit, i cili në çdo dalje televizive ka mbrojtur me forcë vertetësinë e videos, edhe pse sigurisht nuk ka pranuar që të japë asnjë të dhënë mbi burimet e saj.
Kjo video padyshim që u komentua dhe nga Partia Demokratike, e cila gjeti rastin që të kërkonte ‘’kokën” e kryebashkiakut të gjashtë të 30 Qershorit, pas atyre që ka denoncuar se i kap ligji i dekriminalizimit, dhe që kanë fshehur dënime të mëparshme në Itali.
PD deklaronte se kokaina është një standard i njohur i Edi Ramës, dhe është modeli i vetëm që përfaqëson qeverisjen e tij.
Dhe kur të gjithë prisnin reagimin e vetë Allës, ndoshta dhe një shfajësim nga ana e tij, deklarata erdhi, por ajo ishte tërësisht mohuese, pasi sipas të mandatuarit të Bulqizës videoja ishte një montazh, i organizuar nga SHQUP-i, njësoj si në rastin Babale, ku u denoncua vëllai i ish-ministrit të Brendshëm Fatmir Xhafaj, Geron Xhafaj.
Në një tjetër reagim të bërë sot, pasi SPAK nisi hetimet ndaj tij kryesisht, Lefter Alla deklaron se është nisur drejt Tiranës ku do të ngrejë një padi ndaj Ervin Salianjit dhe një drejtuesi të një televizioni lokal, që sipas tij prej një viti e kanë mbajtur të fshehur këtë videomontazh, edhe pse vetë ai ishte në dijeni.
“Dua të informoj opinion publik të Bulqizës dhe të gjithë Shqipërisë, me të drejtë të shokuar nga një video-montazh të publikuar në bashkëpunim nga Partia Demokratike dhe një televizion lokal, se sot jam nisur drejt Tiranës ku do të depozitoj një padi në ngarkim të shtetasit Ervin Salianji, një person me aktivitet përsëritës kriminal për situata të ngjashme, referuar organeve të drejtësisë shqiptare.
Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë”, deklaronte sot Alla.
Ajo që nuk qendron në logjikën e Allës, është fakti që në rast se videoja do të ishte vërtetë shantazh, pse ai nuk ka ngritur më herët padi ndaj autorëve të saj, por priti që ajo të merrte dhenë në mënyrë që ti drejtohet prokurorisë.
Po ashtu mbetet e paqartë se pse Alla nuk ka ngritur padi në drejtim të gazetarit Artan Hoxha, i cili pranon se është disponuesi i videos, edhe më herët se deklaratat e Salianjit apo Partisë Demokratike që reaguan disa orë më pas se publikimi i emrit të Allës.
Ndërkohë që ajo që shton edhe më shumë pikëpyetjet, se po skenohet një ‘’puç” i dytë për Salianjin, për të cilin është kërkuar dënim në rastin ‘Babale”, është heshtja e zgjatur e PS-së, që jo vetëm nuk kanë kërkuar zbardhjen e videos, po duket se po marrin kohë për të kryer kundërsulmin.
Të gjitha reagimet e deritanishme flasin për një faj moral të Allës, nëse video vërtetohet, ndërsa sipas socialistëve ligjërisht ai mbetet i pastër. Por gjithçka mbetet për tu parë, veçanërisht pas deklaratës se Ulsi Manjës i cili kërkoi pezullim të kryebashkiakut Alla deri në përfundim të hetimeve.
(E.K/Faxweb.al)
Discussion about this post