Është caktuar masa e sigurisë “arrest me burg” për F. Rapaj që një ditë më parë kërcënoi me jetë drejtuesin e furgonit ku po udhëtonte dhe pasagjerët. Ngjarja u shënua mëngjesin e Krishtlindjes në një furgon të linjës Tiranë-Vlorë në Qerret të Kavajës.
Brenda pak minutash ai kërcënoi drejtuesin e mjetit dhe më pas të gjithë pasagjerët. Një qytetar që ishte i pranishëm u shpreh se kur F. Rapaj tërhoqi timonin tha “Do iu vdes të gjithëve”. Pas këtij veprimi u njoftuan forcat e policisë, të cilat vunë në pranga 50-vjeçarin.
Në njoftimin e saj, policia bën me dije se gjatë këtij incidenti, mjeti u përplas me trafikndarësen, fatmirësisht pa shkaktuar të lënduar.
“Shtetasi F. Rapaj tentoi të nxirrte furgonin nga rruga duke devijuar timonin. Mjeti u përplas me trafikndarësen, por pa shkaktuar të lënduar.”, bën me dije ndër të tjera policia. (XH.A/SHUPLAKA)
