Ambasadori amerikan Donald Lu mbështet reformat e presidentit të ri amerikan Donald Trump.
Lu është zgjedhur nga ish-presidenti Barack Obama në krye të ambasadës në Tiranë, ndërsa ai ka folur rreth mbështetjes për presidentin e ri në një forum me pedagogë dhe studentë të Fakultetit të Histori-Filologjisë ku është diskutuar për administratën e re të Shteteve të Bashkuara dhe politikën e saj të jashtme.
Në këtë takim ambasadori Lu është shprehur sërish edhe për reformën në drejtësi në Shqipëri duke thënë se ky vit që kemi përpara është i mbushur me shumë sfida, ku më të rëndësishmet janë zbatimi i kësaj reforme dhe zgjedhjet.
Sakaq ambasadori ka folur rreth Shtëpisë së Bardhë dhe politikës së jashtme të presidentit të ri Donald Trump.
“Shtëpia e Bardhë e ka përkufizuar qëllimin e politikës së jashtme të Presidentit si të qëndrueshme, për një botë më të paqtë, me më pak konflikte dhe më shumë interesa të përbashkëta.”, është shprehur Lu.
Ky takim është zhvilluar në formën e një bashkëbisedimi midis Lu-së dhe pjesëmarrësve. Ata kanë bërë një shumllojshmëri pyetjesh, mbi çështjen e NATO-s dhe për shkatërrimin e ISIS-it.
Përsa i përket NATO-s, Lu ka theksuar se Shtetet e Bashkauara të Amerikës do të inkurajonte më shumë kontribute për të gjithë anëtarët e aleancës ndërsa sa i përket çeshtjes së ISIS-it, ai është shprehur se një prioritet e politikës së jashtme të Trumpit është shkatërrimi i plotë i ISIS-it. (K.P/SHUPLAKA)
Discussion about this post