Ambasadori i Bashkimit Europian në Shkup Samuel Zhbogar ka deklaruar se vettingu në gjyqësor në Maqedoninë e Veriut nuk është i nevojshem duke rekomanduar se duhet bërë ndërhyrje përmes shfrytëzimit të të gjitha elementet e tjera për përmirësimin e gjendjes në gjyqësor.
Zhbogar tha gjatë një prononcimi për mediat ditën e djeshme se vetting është gjithmonë zgjedhja e fundit duke theksuar se kjo vjen pas dakortësimit të të gjitha palëve politike.
“Qëndrimi jonë është i qartë, ne mbështesim që gjykata t’i shfrytëzoj elementet për përmirësimin e gjykatës nga brenda. Ne do të vazhdojmë me mbështetjen tonë si në të kaluarën ashtu dhe në të ardhmen, nga viti i ardhshëm planifikojmë projekt për monitorimin e rasteve me korrupsion të lartë dhe besojmë se kjo do të përmirësoj funksionimin e gjykatës. Vetingu gjithmonë është opsioni i fundit. Për vetingun ka një parakusht, është konsensusi i të gjitha palëve politike, ajo është zgjidhja e fundit dhe për momentin nuk shoh se ka nevojë për një gjë të tillë. Gjithsesi se qëndrimi jonë është se vendimi bie mbi vetë shteti”, tha ambasadori, shkruan Alsat.
Zhbogar u takua dje me kreun e Gjykatës Kushtetuese, Sali Murati nga ku pas takimit bëri edhe këto komente.
Murati e ka njohur ambasadorin Zhbogar me punën e këtij institucioni si dhe projekt ligjin për Gjykatën Kushtetuese.
“Biseduam për ardhmërinë e Gjykatës Kushtetuese, jemi të kënaqur nga bisedimet dhe do ta vazhdojmë dialogun me Këshillin Evropian dhe institucionet tjera evropiane. Kemi draft version të ligjit për Gjykatën Kushtetuese, sepse të gjitha vendet në Evropë që kanë gjykatë kushtetuese kanë Ligj, tek ne mungon kjo, prandaj po punojmë për atë version dhe kur të jetë gati kjo çështje do të zgjidhet njësoj sikurse edhe vendet tjera të rajonit”, deklaroi Murati.
Edhe pse për Shqipërinë, Bashkimi Europian nxiti realizimin e procesit të vettingut në gjyqësor dhe publikisht deklaron se është një sukses, lëvizjet e kryera në Rajon dëshmojnë për të kundërtën. Gjatë miratimit dhe zbatimit të vettingut në Shqipëri. Kryeministri Edi Rama, është shprehur në mënyrë të vazhdueshme, se ky proces do të shërbejë edhe si model për vendet e tjera të Rajonit.
Mediat në Maqedoninë e Veriut shprehen se Kryeministri Zoran Zaev ka kërkuar që të aplikohet vettingu në gjyqësor sipas modelit të Shqipërisë, por Bashkimi Europian e ka refuzuar këtë kërkesë por që përmes ambasadorit, BE e duket sikur e ka hedhur poshtë këtë propozim.
(F.GJ/FAXWEB.AL)
