Ambasadori Donald Lu ka shprehur sot mbështetjen e tij për lirinë e medias në Shqipëri dhe është solidarizuar me 4 gazetarë të cilët përballen më një padi civile nga gjyqtari i apelit dhe anëtari i KLD-së Gjin Gjoni, me vlerë 82,000 euro.
Gazetarët Aleksandra Bogdani, Besar Likmeta, Adriatik Doçi dhe Elton Qyno morën mbështetjen e Ambasadorit Lu në përballjen ligjore me gjyqtarin Gjin Gjoni, për padinë e ngritur nga ky i fundit në Gjykatën e Tiranës.
“Beteja juaj, është beteja jonë” dhe me hashtagun “Nuk do të hiqja asnjë presje”, shkruhet në faqen zyrtare të Ambasadës Amerikane.
Gjyqtari Gjin Gjoni ngriti një padi ndaj 4 gazetarëve me pretendimin se raportimet mbi hetimet penale dhe vendimet gjyqësore përkatëse mbi pasurinë e tij familjare i kanë shkaktuar cënim të imazhit, dëm jomaterial dhe dhimbje e vuajtje shpirtërore.
“Thellësisht mirënjohës Ambasadës Amerikane dhe ambasadorit Donald Lu, kolonës më të rëndësishme të besimit, referencës dhe moralit në Shqipëri, për inkurajimin në betejën kundër ‘balenës blu’ të drejtësisë së vjetër shqiptare. “Beteja juaj është beteja jonë!” – Kjo ishte kryefjala e takimit”, shkruan në rrjetet sociale Adriatik Doçi pas takimit.
(M.D/Shuplaka)
*Foto:Ivana Dervishi
