Situata politike në vendin tonë nuk ka lënë pa përfshirë as përfaqësitë diplomatike në vend. Nga Vlora ku ka inspektuar ndërtimin e nënstacionit të Orikumit ambasadorja gjermane Susanne Schütz është shprehur se opozita duhet të futet në Parlament.
Ajo ka shtuar se padyshim që zgjedhjet duhet të zhvillohen sipas standardeve në të mirë të integrimit të Shqipërisë.
“Opozita duhet të futet në Parlament dhe të japë kontributin e saj në reformën në drejtësi. Ashtu sikurse Gjermania është shprehur zgjedhjet duhet të jenë të lira e të ndershme dhe të zhvillohen në kohën e duhur. Në zgjedhje duhet të marrin pjesë ato parti që dëshirojnë të futen”, është shprehur ambasadorja.
Në inspektime ishte i pranishëm edhe Ministri i Energjetikës Damian Gjiknuri i cili u shpreh se koalicioni po qeveris dhe vendi duhet të shkojë në zgjedhje në kohën e caktuar.
“Shqipëria ka nevojë për stabilitet, zgjedhjet duhet të bëhen në kohen e caktuar dhe opozita duhet të futet në Parlament, koalicioni po qeveris”, është shprehur Gjiknuri.
Nga ana tjetër ende nuk ka hapa konkret përsa i përket një dialogu mes palëve politike në vend. Një takim që u zhvillua mes kryeministrit Rama dhe Kryeparlamentarit Meta nuk ka dhënë një përgjigje të qartë. (E.K/SHUPLAKA)
Discussion about this post