Pas një artikulli të publikuar nga nga gazeta “De Telegraaf” në Holandë, ditët e fundit politika shqiptare është përfshirë nga një debat për rikthimin e vizave nga Holanda.
Ambasadorja e Shqipërisë në Holandë, Aida Sakiqi, e ftuar në “T.CH ” ka sqaruar se një raport i tillë nuk ekziston.
“Nuk bëhet fjalë për një raport, por për një artikull të një gazete. Ai është një artikull i shkurtër me një intervistë me një polic. U habita kur e pashë artikullin e përkthyer si raport në disa media në Shqipëri. Në artikull thuhet se ekziston një memo, normalisht duhet të ekzistojë një gjë e tillë, nga ana e policisë, por nuk është raport”, ka sqaruar ambasadorja Aida Sakiqi.
Ndërkohë e pyetur se nëse mund të rrezikohet rikthimi i regjimit për t’u pajisur me viza për të lëvizur në vendet e zonës Shengen, ambasadorja tha se sheh si të pamundur që kjo të ndodhë duke theksuar se ky është një vendim i shumë shteteve, jo vetëm i Holandës.
“Ky rrezik nuk ekziston, është një vendim i shumë vendeve. Nuk ka pasur asnjë kërkesë të autoriteteve holandeze. Jam interesuar dhe kam marrë sigurinë se një raport i tillë nuk ekziston”, tha ajo.
(S.SH/Shuplaka)
Discussion about this post