Ylli Manjani, ish-ministri i Drejtësisë dhe njëkohësisht jurist ngriti dje shqetësimin e sigurimit të detyrueshëm, duke detyruar Autoritetin e Mbikëqyrjes Financiare të japë shpjegime për sigurimin e pasurive të patundshme në fatkeqësitë natyrore.
”Autoriteti i Mbikëqyrjes Financiare, nisur nga disa raportime në media ditët e fundit, sqaron se drafti teknik “Për sigurimin nga katastrofat” është hartuar nga Banka Botërore dhe është depozituar në Autoritet në tetor 2015. Materiali është pjesë e një nisme të Bankës Botërore, e cila përfshin edhe vende të tjera të rajonit të cilat vitet e fundit janë prekur shpesh nga fatkeqësi natyrore, sidomos nga përmbytjet. Materiali teknik i sjellë nga ekspertët e Bankës Botërore është përcjellë edhe tek agjencitë e tjera shtetërore që kanë objekt të punës së tyre ngjarjet nga fatkeqësitë natyrore. ”, reagon AMF.
Sipas këtij institucioni që prej fillimit të vitit 2016, nuk ka zhvillime të reja lidhur me këtë draft teknik dhe rekomandimet e dhëna nga ekspertët e Bankës Botërore.
”AMF thekson se çdo nismë ligjore që do të propozohet nga Autoriteti, do të bëhet në transparencë të plotë, me të gjithë grupet e interesit duke pasur në vëmendje mbrojtjen e të gjitha interesave të qytetarëve. Kjo u theksua edhe në konferencën për shtyp të datës 26 shtator 2017, nga Drejtori i Përgjithshëm Ekzekutiv i Autoritetit të Mbikëqyrjes Financiare, Z. Ervin Koçi. Duke iu përgjigjur pyetjes së gazetarëve, Z. Koçi u shpreh për problematikat e lidhura me ngjarjet natyrore si përmbytje apo tërmete që kanë goditur jo vetëm Shqipërinë por edhe vendet e rajonit, dhe theksoi se “Duhet të jemi shumë të kujdesshëm kur vendosim në ligj detyrimin nga qytetarët, sepse shërbimi duhet t’i përgjigjet nivelit të detyrimit, që duhet të paguaj çdo qytetar në Republikën e Shqipërisë”.”, komenton më tej në deklaratë AMF-ja.
Të gjithë këtë reagim Manjani e quan një lajm të mirë, duke shtuar: ”AMF do kishte bërë mirë të publikonte Projektin, që të mos komentonim mbi lajmet por mbi projektin konkret, i cili duhet të jetë pro “rrjepjes”…Sidoqoftë shumë mirë që biem dakort në parim që sigurimi është vullnetar. Tani pyetja e fundit që kam: nëse biem dakort që sigurimi është vullentar, përse duhet ky ligji?! Ligj ka plot…Nejse, të presim e të shohim!Tërheqja është lajm i mirë. ”
Aktualisht, Ligji nr. 52, datë 22.05.2014 “Për veprimtarinë e sigurimit dhe risigurimit” u jep mundësinë qytetarëve që të sigurohen nga zjarri dhe forcat e natyrës në mënyrë vullnetare. (V.G/SHUPLAKA)
