Kastriot Tusha, tenori i njohur që prej dy muajsh ka marrë një status të ri. Është bërë gjysh, kjo pasi djali Petriti është bërë baba i një vajze, të cilën e kanë qujtur Harper.
Tusha flet rrallëherë në publik për jetën e tij familjare, por emocionet e një gëzimi që sapo ka ardhur në familjen e tij, nuk mundet t’i mbajë vetëm për vete.
I ftuar pasditen e djeshme në “Rudina” për të folur për projektet e tij të reja, Tusha është ndalur për të rrëfyer më shumë edhe për profilin jashtë muzikës.
Edhe pse kanë kaluar 27-vite nga martesa e tij, tenori tregon se duket sikur ka qenë mbrëmë. Petriti, i biri, tashmë ka krijuar familjen e tij të re me bashkëshorten Jonën, dhe më të bijën dy muajshe, Harper.
I pyetur se si i duket vetja gjysh, Tusha tha se mbesa i ka vënë përballë përgjegjësive por edhe gëzimi që ndjen është i pakrahasueshëm.
“Na ka zbukuruar jetën, por edhe na ka vënë para përgjegjësisë…Unë kam edhe mamanë gjallë dhe asaj i them “ti e ke tri herë mjaltë”, thotë ai me të qeshur.
Ndërsa vajzës, Amisës, e cila tashmë është studente që ka nisur të mendojë për familjen e re, meqenëse është e fejuar, tenori i ka kushtuar një këngë “Bija ime”, një kujtim mjaft i bukur që do t’i shoqërojë gjithmonë të dy.
Pasi u publikua kënga, tregon Tusha, në shumë gëzime familjare i propozonin ta merrte edhe të bijën me vete dhe të këndonte bashkë me të (meqenëse ajo është edhe pjesë e klipit), por pas disa herëve, ai e kishte të vështirë t’i përmbante lotët: “I thashë vajzës që nuk do të të marr më me vete…” – tregon tenori pa i fshehur emocionet.
(E.K/SHUPLAKA)
