I ftuar në emisionin “Arena” në Ora News, analisti Lorenc Vangjeli ka bërë një deklaratë të bujshme. Teksa flitej për zgjedhjen e presidentit, ku një prej më të përfolurve është kryetari i LSI-së dhe Kuvendit Ilir Meta, ai u shpreh se kryeparlamentari do të jetë president republike, por jo në vitin 2017.
“Ilir Meta e ka shprehur qartë se nuk e ka këtë ambicie, do të jetë President por jo kësaj rradhe. Është një fall që unë e hedh, por jo për 2017. Në pushtet njerëzit janë emëruar, në opozitë njerëzit janë bërë vetë. Të gjithë ata që çalojnë në politikë janë të gjithë ata që kanë hyrë nga dera e pushtetit dhe janë emëruar prej pushtetit. Janë njerëz të cilët kanë pasur shkëlqim për aq kohë sa kanë pasur karrigen poshtë vetes dhe pastaj janë harruar. Dhe ka një tjetër rracë politikanësh që janë vetëbërë dhe kanë kaluar në opozitë. Rasti i Ilir Metës është një krijesë e vetëvetes por dhe rrethanave dhe është krijuar fillimisht në opozitë”, u shpreh ndër të tjera analisti Lorenc Vangjeli, i cili është edhe këshilltar i kryeparlamentarit Meta.
Emrin e Ilir Metës si president pasi ti mbarojë mandati Bujar Nishanit është përfolur shumë në media. Madje kanë qenë edhe eksponentë të lartë të PS-së që e kanë pranuar publikisht këtë ide, por vetë kreu i LSI-së as e ka pohuar dhe as e ka mohuar një gjë të tillë.
Nga partia që ai drejton, LSI, shpeshherë janë dëgjuar deklarata që e shohin Ilir Metën kryeministër pas zgjedhjeve të 18 qeshorit. (A.R/SHUPLAKA)
Discussion about this post