Presidenti i Shteteve të Bashkuara të Amerikës, Donald Trump, ka nënshkruar së fundmi miratimin për anëtarësimin e Malit të Zi në NATO, çka i hap dritën jeshile këtij shteti ballkanik.
“NATO është qendra për sigurimin e paqes dhe sigurisë në kontinentin europian”, tha Shtëpia e Bardhë në deklaratën e saj, duke shtuar se anëtarësimi i Malit të Zi do të shërbejë si sinjalizim për kandidatët e tjerë se “dera për anëtarësimin e vendeve të tjera në bashkësinë euro-atlantike mbetet e hapur”.
“Vendet e Ballkanit Perëndimor janë të lira të zgjedhin të ardhmen e tyre pa ndërhyrje nga jashtë apo frikësim”, vijon më tej deklarata.
Muajin e kaluar Senati ratifikoi me shumicë dërrmuese vendimin për pranimin e Malit të Zi në NATO. Hapi i fundit mbetet miratimi në parlamentin malazez të dokumentit që e bën Malin e Zi vendin e 29 që anëtarësohet në NATO.
(XH.A/SHUPLAKA)
