Pas deklaratave të ministrit grek të mbrojtjes, Panos Kamenos, se duhet rishikuar Traktati i Lozanës së vitit 1923 dhe ku i quan idiotësira deklaratat e kryeministrit shqiptar Edi Rama lidhur me çështjen çame, ka reaguar edhe Ministria e Jashtme e Turqisë.
Përmes një deklarate për shtyp, kjo ministri shprehet se, këto qëndrime jo vetëm që nuk i shërbejnë fqinjësisë së mirë, por i dëmtojnë ato.
“Sjellja dhe deklaratat e ministrit grek të Mbrojtjes, që mesa duket e ka humbur arsyetimin dhe gjykimin, aq sa së fundmi vlerësoi organizata të lidhura me akte dhune dhe terrori në Qipro, dëmtojnë përpjekjet për bashkëpunimin që po përpiqemi të vendosim mes dy vendeve”, thuhet në deklaratën e ministrisë së jashtme turke.
Ankaraja zyrtare i kërkon Kamenos që të shmangë deklaratat e tilla dhe të ngrihet “në lartësinë dhe përgjegjësinë e detyrës shtetërore që mban”.
