Ministria e Shëndetësisë ka reaguar ndaj ankesës së këngëtares Eneda Tarifa bërë një ditë më parë. Eneda Tarifa u ankua ditën e djeshme se shërbimi i ambulancës ishte vonuar në një rast urgjence ku ajo ishte vetë e pranishme.
“Ky është kulmi ! O njerëz, si ka mundesi të marrësh urgjencën tre herë dhe ata të mos e venë ujin në zjarr?1 Nuk ma rrok truri, një qytet me gati 1 milion banorë, të mos verë në gadishmëri (në fundjavë të paktën) më shumë se dy apo tre ambulanca? Këtu nuk pi ujë as emri as njohja asgjë. Është thjesht një dështim. Këtu njeriut i bie epilepsia dhe ambulanca vjen mbas 40 minutash? SOS. Ca i vrasin, ca i lenë të vdesin.”, – shkruante këngëtarja.
Ky pretendim i saj është hedhur poshtë nga Ministria e Shëndetësisë, e cila ka deklaruar se ambulanca shkoi në vendngjarje për katër minuta.
Në videoregjistrimin elektronik të vënë në shërbim të “Gazetës Express”, ministria bën me dije se thirrja për t’i ardhur në ndihmë personit në nevojë është marrë nga centrali i shërbimit të urgjencës mjekësore në orën 06:10 dhe autoambulanca ka mbërritur në vendngjarje për t’i ardhur në ndihmë qytetarit në fjalë në 06:14.
Discussion about this post