Komisioni i Ankesave dhe Sanksioneve, ka marrë vendimin për të shtyrë seancat e shqyrtimit për kërkesat e Partisë Demokratike, në ditët në vijim për qarqet Vlorë, Gjirokastër dhe Berat.
Konkretisht, ditën e nesërme do të shqyrtohet ankimi i PD-së për qarkun Vlorë, në orën 12:30, për pavlefshmërinë e rezultateve të zgjedhjeve të 11 majit, duke kërkuar ripërsëritjen e procesit zgjedhor. Për këtë qark, koalicioni “Nisma Shqipëria Bëhet”, ka kërkuar rinumërimin e votave, gjë që do të shqyrtohet gjithashtu nesër.
Sakaq, nesër në orën 16:00, do të shqyrtohet kërkesa e demokratëve për qarkun Gjirokastër. Ditën e martë, me datë 10 qershor, në orën 10:30, do të shqyrtohet kërkesa ndaj qarkut Berat, njofton Komisioni Qendror i Zgjedhjeve.
Kujtojmë se një ditë më parë, KAS-i ka shtyrë të gjitha seancat e kërkesave ankimore të kërkuar nga Partia Demokratike për qarqet Shkodër, Kukës dhe Lezhë. Edhe për këto qarqe, PD-ja nuk pranon rezultatet dhe kërkon të ribëhet procesi zgjedhor. Për qarkun e Shkodrës, seanca është shtyrë ditën e hënë, me datë 09.06.2025, në orën 10:30. Për qarkun e Kukësit, do të vijohet seanca ditën e merkurë, me datë 04.06.2025, në orën 16:00. Ndërsa për qarkun e Lezhës, seanca është shtyrë për ditën enjte, me datë 05.06.2025, në orën 15:00.
Teksa PD-ja nuk pranon rezultatet e zgjedhjeve të 11 majit, disa kandidatë kanë kërkuar rinumërimin e votave, përfshirë Ilir Alimehmeti, Mimoza Hajdarmataj, Lisandër Hoxha dhe Aulon Kalaja. Berisha shprehet se e mbështet në kërkesën e tyre, por fillimisht duhet që të shpallen të pavlefshme zgjedhjet e 11 majit, për të vijuar më pas me ankesat e demokratëve. Sipas tij, mbështetja ndaj kandidatëve që kanë kërkuar rinumërimin do të vijë duke respektuar platformën e përcaktuar nga Partia Demokratike, në përputhje me ligjin elektoral.
