Vetëm gjatë muajit qershor, policia italiane ka arritur të bllokojë rreth 6 tonë lëndë narkotike kanabis. Këto janë të dhënat që ka publikuar Drejtoria e Antidrogës italiane.
Zëri i Amërikës shkruan se në këtë sasi narkotikësh policia italiane kategorizon hashashin (një lloj droge që trafikohet kryesisht nga Maroku në formë çokollate), marijuanën (që trafikohet kryesisht nga Shqipëria) si dhe bimët e marijuanës që kultivohen kryesisht në disa zona në Jug të Italisë.
Nga këto 6 tonë kanabis të sekuestruara gjithësejt rreth 5,2 tonë ishin marijuanë, rreth 700 kilogramë hashish dhe rreth 37 mijë ishin bimë narkotike të asgjësuara në brendësi të territorit italian.
Ndërkohë, vetëm gjatë qershorit janë arrestuar 1.604 persona në 1705 operacione nga të cilët 798 të huaj, pjesa më e madhe e të cilëve nga Shqipëria.
Sakaq, sipas këtyre të dhënave të publikuara nga Antidroga italiane, trafiku i heroinës është rritur ndjeshëm krahasur me një vit më parë. Në qershor të vitit 2017 u bllokuan 44kg heroine nga 19 kg heroinë që ishin bllokuar qershorin e vitit 2016. (D.D/Shuplaka)
