Për fabrikën e Bitumit në zonën e Pezës, ‘’Fax News” ka qenë sërish sot pranë banorëve.
Në rradhët e banorëve shqetësimi vijon të jetë i lartë, pasi derimë tani ata nuk kanë marrë asnjë përgjigje nga ana e Bashkisë së Tiranës.
Dy ditë pas protestës së të shtunës, ku qindra banorë dolën në rrugë, fabrika ka ndërprerë punën, po nuk dihet se deri kur.
Një prej banorëve tregoi në ‘’Fax News” shqetësimet që ata kishin ndjerë që në ditët e para të hapjes së fabrikës.
“Na kanë thënë se është një fabrikë e teknologjisë së lartë dhe se nuk do të ndjenim shqetësime. Po sa filloi punën fabrika filluan edhe shqetësimet.
Më mirë të na japin një vend tjetër për të jetuar dhe ta groposin këtë luginë të bukur që është këtu. Është e pamundur që ne të jetojmë së bashku me impiantin.
Neve na vjen keq se kjo luginë është si një hyrje në Austri, me gjelbërimin dhe me gjithçka që ofron.
I kemi çuar një ankesë Bashkisë po ende nuk na ka kthyer një përgjigje. Mos na e ndotni ajrin, për vete shkoni në malin e Dajtit, në Amerikë, na lini rehat neve të paktën që të rrisim këta fëmijë. Do zoti ishalla fjala jonë të dëgjohet. Ne më shumë kemi besim te zoti se te Gjykatat”, u shpreh banori.
(E.K/FAXWEB)
