Gjykata e Apelit për Krimet e Rënda ka marrë sot vendimin e papritur për shpalljen të pafajshëm të të gjithë anëtarëve të organizatës “Hakmarrja për Drejtësi”.
Ndryshe nga të gjithë vendimet e shkallëve të tjera, ajo shpalli të pafajshëm dy themeluesit e bandës, vëllezërit Orik dhe Leart Shytin, si dhe anëtarët: Altin Arapin, Dritan Hatën, Gent Cakën, Nikolin Pashaj Novruzaj, Gëzim Gjoni, Kreshnik Spahiu, Roland Shyti.
Vëllezërit Shyti janë djemtë e Aredin Shytit, një ndër figurat më të rëndësishme të Ministrisë së Brendshme gjatë diktaturës komuniste dhe gjatë qeverisjes e ish-kryeministrit Fatos Nano. Babai i tyre, Aredin Shyti, u dënua me 17 vjet burg për “vrasje me dashje indirekte” të 4 demonstruesve të civilë në 2 prill 1991 Shkodër.
Organizata “Hakmarrje për Drejtësi” u shpall publikisht në 13 tetor 1996 dhe kishte për qëllim destabilitetin e vendit.
Seanca e parë gjyqësore në ngarkim të pjesëtarëve të bandës “Hakmarrja për Drejtësi” nisi në 24 dhjetor 1998. Dhjetë të pandehurit u larguan jashtë shtetit që nga dita që ata u arratisën nga burgjet në vitin 1997.
Në mars të 2016-ës, Gjykata e Lartë riktheu për gjykim dosjen e bandës, duke ia kaluar atë për gjykim Apelit të Krimeve të Rënda.
Anëtarët e bandës akuzoheshin për ngjarje të rënda si vendosja e bombës tek një supermarket pranë 9-katësheve, vrasja e ish-drejtorit të Burgjeve, Bujar Kaloshi, vjedhje të bankave të ndryshme dhe arkave të shtetit, si dhe rrëmbim e vrasje të tjera. Këto akuza janë hedhur poshtë nga anëtarët e bandës. (XH.A/SHUPLAKA)
(Orik dhe Leart Shyti)
