Vetëm pa muaj më parë një nënë humbi jetën bashkë me fëmijën e saj maternitetin e Tiranës “Koço Gliozheni”, nëna ishte nëntë muaj shtatzënë. U përfol shumë edhe në media për këtë ngjarje dhe disa mjekë u vunë nën akuzë. Ndërkohë që një nga gjërat që u anashkalua, ishin pajisjet jo të mira që mund të bënin diagnostikimin e duhur dhe të shpëtonin jetën e nënës dhe fëmijës, shkruan gazeta shëndeti +. Sipas saj tashmë mjekët e maternitetit Koço Gliozhenit i bëjnë thirrje njëri-tjetrit që të dhurojnë para për blerjen e një aparature ekografie në spitalin ku punojnë, në mënyrë që të mund të ofrojnë një shërbim cilësor. Kjo pasi në këtë maternitet ka mungesë të investimeve. Në fakt këto investime janë përgjegjësi e Ministrisë së Shëndetësisë, e cila duhet të analizojë gjendjen e aparaturave në shërbimin spitalor. Ky maternitet aktualisht ka vetëm 2 ekografi funksionale (nga 4 ekografi gjendje), por që cilësia e të cilave lë për të dëshiruar. Sipas gazeta shëndetit + këto pajisje janë sjellë në këtë institucion që në kohën e përurimit të tij.
Drejtuesi i këtij materniteti, doktor Arben Rrugia, shprehet se blerja e ekografisë është nismë e njërit prej mjekëve dhe njëkohësisht shef shërbimi të këtij institucioni, ndërsa nuk dëshiron të prononcohet diçka më tepër lidhur me komunikimin që institucioni që ai drejton ka pasur me Ministrinë e Shëndetësisë lidhur me kërkesat për aparatura të reja. “Detyrim nuk ka, sepse është një nismë me baza vullnetare. Na ka shkuar goja mbrapa prej vitesh për të marrë një aparaturë ekografie. Ky spital nuk ka asnjë investim që prej momentit që është ndërtuar. Janë po ato aparatura që sollën kur u ndërtua dhe që tani janë totalisht jashtë çdo parametri bashkëkohor. Një aparat ekografie në këtë spital është i domosdoshëm.Ministria e Shëndetësisë nuk arrin ta kuptojë, nuk dëshiron ta kuptojë dhe është e paaftë ta kuptojë. Por me gjithë këmbëngulet tona, nuk e ka sjellë. Nga ana tjetër, kur përballemi me rastet e vështira, me pacientët, përgjegjësinë e mbajmë ne mjekët. Duhet menduar që teknologjia ecën përpara. Nuk mund të dërgosh aparat ekografie në Gjirokastër që ka 100 lindje në vit dhe të mos sjellësh në një maternitet që ka 5 mijë lindje në vit”, u shpreh ai.
Ai shtoi me tej se janë bërë shumë kërkesa d he përgjigjja ka qenë: Nuk kemi para. “Deri në zgjedhje nuk ka para. Në këto kushte, me dashamirësinë më të madhe për t’i shërbyer spitalit, biseduam me një fondacion të njerëzve të biznesit që do të kontribuojnë për blerjen e kësaj ekografie. Kjo është një formë për t’i sensibilizuar pak më shumë këta njerëz që janë jashtë profilit. Unë u bëra një thirrje kolegëve të mi për donacion. Nëse dikush dëshiron ta interpretojë këtë nismë, le ta dijë që nuk kam përfitime. Unë kam bërë donacionin tim. Është hapur në internet një faqe dhe një numër llogarie ku çdokush mund të shikojë aparatin e ekografisë dhe koston, si dhe është e hapur të shihet se sa ka kontribuar secili, për transparence” u shpreh mjeku.
Ai shtoi me tej se aktualisht në këtë maternitet janë 4 aparatura ekografie dhe janë prodhime të vjetra jashtë çdo standardi. “Janë aparatura për t’u vënë në muze. Ne bëjmë 50.000 ekzaminime ekografie në vit. Pavarësisht se janë profesionistët ata që i bëjnë, lënë shumë për të dëshiruar nga pikëpamja profesionale. Ministria nuk ka bërë asnjë investim në infrastrukturë dhe është gjynah” përfundoi mjeku. (J.V/Shuplaka)
