Jep dorëheqjen Drejtori i Sigurimit të Informacionit të klasifikuar, Arben Seferi. Formularin e dorëheqjes Seferi ia ka dërguar kryeministrit Edi Rama.
Në këtë letër ai tregon se është etiketuar për anësi politike, prandaj është shtyrë të marrë këtë vendim.
Sipas Seferit, largimi i tij nga funksioni do të shërbejë për të eliminuar çdo alibi të të gjithë atyre që frikësohen nga reforma dhe pikësëpari nga vettingu. “Pavarësisht largimit tim, Drejtoria do të ketë rol të veçantë në Reformën në Drejtësi”, është shprehur ai.
Pak orë para Seferit, një tjetër drejtor i lartë i dorëzoi dorëheqjen kryeministrit Rama. Ai është Alket Hyseni, Drejtori i Parandalimit të Pastrimit të Parave. Në një letër drejtuar kryeministrit Rama, ai shprehet se emri i tij është lakuar së shumti gjatë javëve të fundit, “nga ata që nuk kanë interes që reforma në drejtësi të gjejë një zbatim të shpejtë dhe efikas”.
“Duke qenë i ndërgjegjshëm që reforma në drejtësi është një proces i pathyeshëm, e duke qenë i bindur se është në interesin e të gjithë shoqërisë shqiptare që ky process të zhvillohet sa më shpejt, ndiej se largimi im nga funksioni që kryej do të shërbejë për të eleminuar çdo alibi të të gjithë atyre që frikësohen nga reforma dhe pikësëpari nga Vetting-u”, shprehet ai. (D.D/Shuplaka)
