Vijojnë replikat mes Ministrit të Punëve të Jashtme, Ditmir Bushati dhe Kreut të Lartë të Shtetit, Bujar Nishani. Gjatë një takimi të organizuar ditën e sotme me strukturat e PS-së në Shkodër, ai i ka kthyer përgjigje reagimit të një dite më parë të Nishanit.
Ministri Bushati është shprehur ditën e sotme se shkresa dërguar presidentit Nishani është lehtësisht e verifikueshme. Sqarimi në të ishte shterues dhe i është komunikuar Presidencës përpara deklaratës në komision.
“Shkresa për presidentin është lehtësisht e verifikueshme. Ne kemi vepruar në përputhje me ligjin dhe sqarimi ka qenë tërësisht shterues. Ministria e Punëve të Jashtme i është përgjigjur në formë shkresore Presidentit Bujar Nishani që kërkoi informacion shkresor për çështjen. Informimi është bërë përpara deklaratës në komision.”, është shprehur ndër të tjera ai.
Ky reagim i sotëm i tij vjen pas deklaratës së djeshme të Presidencës, që e deklaroi të pavërtetë deklaratën e ministrit në komision, i pyetur nga Topalli për votën kundër në NATO.
Nisur nga deklarata e bërë sot në Komisionin për Politikën e Jashtme të Kuvendit të Shqipërisë, nga Ministri i Punëve të Jashtme, zoti Ditmir Bushati, për votimin në Asamblenë e Përgjithshme të Kombeve të Bashkuara të rezolutës për armët bërthamore, sqarojmë se, Deklarata e Ministrit Bushati se: “Presidenti i Republikës, ka marrë sqarim po në rrugë institucionale”, është krejtësisht e pavërtetë,” shkruhej në komunikatën e Presidencës. (XH.A/SHUPLAKA)
Discussion about this post