Ministri i Punëve të Brendshme Saimir Tahiri ishte i pranishëm në një takim me komunitetin fetar katolik në Shkodër.
Gjatë këtij takimi, arqipeshkvi i Shkodrës Imzot Angelo Massafra i bëri thirrje ministrit Tahiri që të mbrojnë qytetarët, të cilët janë të armatosur sepse kanë frikë.
Nga ana tjetër, arqipeshkvi i bëri thirrje qytetarëve që t’i dorëzojnë armët pasi po afrohet afati i fundit i këtij procesi.
“Janë të frikësuar ndaj mbajnë armë. Nuk janë të siguruar nga shteti. I bëj thirrje që të dorëzojnë armët por edhe shteti duhet të jetë më i fortë dhe të mbrojë qytetarët ne mënyrë që të mos kenë frikë dhe të mbajnë armë”, tha ai.
Ndërkohë edhe ministri Tahiri bën thirrje që ta lëmë pas dhunën edhe armët, duke shtuar se burrë është ai që heq dorë nga ato.
“Duhet të çarmatosim mendjen, arsyen më shumë se të çarmatoset komuniteti nga dhuna nga represioni dhe që na detyron të jemi përballë njëri-tjetrit dhe disa përdorin armët. Burrë është ai që fal dhe kush justifikohet me traditën se shqiptari nuk e lëshon armën, bën gabim dhe është kërcënim për të ardhmen. Të rinjtë kurrë nuk mund ti referohen armës dhe dhunës dhe shqiptaret duhet të referohen jo për armën por për arsyen dhe dijen. Burrë është ai që e dorëzon armën. Nuk funksionon vetëm si përpjekje e qeverisë por duhet të jetë përpjekje e shoqërisë. Të lëmë pas krahëve dhunën dhe armët. Shqipëria pa armë është një objektiv i madh i qeverisë tonë por duhet të jetë edhe i qytetarëve. Kushdo që njeh dikë që ka një armë të njoftojë.”, tha ai. (D.D/Shuplaka)
