Arrestimet për grabitjen, Blushi: Kur policia nuk bën politikë por detyrën

Kreu i LIBRA-s, Ben Blushi, përgëzon Policinë e Shtetit për arrestimin e autorëve të dyshuar për grabitjen e 3.2 milion dollarëve në afërsi të Rinasit.

“Kur policia nuk bën politikë bën detyrën. Besoj se është rasti për të përgëzuar forcat e policisë që kapën grabitësit e bankës.Kur policia bën politikë duhet të jemi të gjithë kundër saj. Kur policia bën detyrën duhet të jemi në mbështetje të saj. Shpresoj që kjo arritje të mos kthehet në cadër euforie për shiun e krimeve të pazbuluara ende.”, shkruan Blushi.

Pas një operacioni të përbashkët të forcave RENEA, FNSH-së dhe Policisë së Tiranës, këtë pasdite u arrestuan katër të dyshuarit për grabitjen në Rinas, të 3.2 milionë dollarëve.

Të arrestuarit nga policia janë:

• Fation Xhyliu, 33 vjeç, lindur në Lushnjë dhe banues në Tiranë, ish-punonjës në Shpsf “Rogat”, 
• Ditjon Memlika, 31 vjeç, lindur në Tepelenë dhe banues ne Tiranë, ish-efektiv në forcat ushtarake, 
• Neim Avdulaj, 28 vjeç, lindur në Vlorë dhe banues në Tiranë, ish-ushtar profesionist në forcat ushtarake të Zallherrit, 
• Ernest Kupa, me banim në Krujë, me biznes privat. (D.D/Shuplaka)