Rudina Jasini, e cila ka qenë njëkohësisht në grupin e avokatëve të Haradinajt që bëri mbrojtjen e tij në Gjykatën e Hagës në 2004-ën, ka sqaruar për “Zërin e Amerikës” se arrestimi i Ramush Haradinaj ka ngritur disa pikëpyetje. “Akuzat për të cilat është dhënë urdhri i arrestit në vitin 2004, janë të përmbledhura në akuzat mbi të cilat tribunali i OKB-së për ish-Jugosllavinë është shprehur qartë në dy procese: në të parin, atë të gjykimit dhe në procesin e rigjykimit. Në të dyja proceset tribunali është shprehur shumë bindshëm mbi pafajsinë e Haradinaj dhe dy të akuzuarve të tjerë.”, është shprehur avokatja.
E pyetur se cilat janë alternativat e mundshme përpara autoriteteve franceze, avokatja e Hagës sqaroi se nëse të enjten Ramush Haradinaj gjykohet në bazë të akt-akuzës së 2004-ës, ai nuk ka se si të ekstradohet. Por në rast se gjykohet mbi bazën e disa të dhënave të tjera ende të paditura, mbetet për t’u parë se si do të vlerësohet.
Nëse arrestimi i kreut të AAK-së lidhet me përfshirjen e faktorëve politiko-diplomatikë, avokatja Rudina Jasini u përgjigj: “Nëse bëhet fjalë për një procedurë tërësisht teknike, Interpoli duket të përgjigjet përse ky urdhër nuk është ekzekutuar sa herë që ai ka hyrë dhe ka dalë nëpër aeroportet apo pikat kufitare të BE-së. Pa diskutim që na lind një pyetje e natyrshme, që një motivim politik, i është dhënë mbase një sinjal dhe një mesazh i përcaktuar qartë Kosovës, dhe lidershipit dhe qeverisë së shtetit të Kosovës.” (XH.A/SHUPLAKA)
