Arrestimi i Xhulia Aliajt për përhapje të panikut pas tërmetit në rrjetet sociale ka shkaktuar një përplasje mes Dom Gjergj Metës dhe Delina Ficos, ish-bashkëshortja e ministrit të Bujqësisë, Bledi Çuçi. Në “Facebook”, Dom Gjergj Meta dënoi prangosjen e të resë dhe e quajti veprimin e policisë si të nxituar.
“Arrestimi i vajzës nga Durrësi, Xhulia Aliaj, më duket një veprim i nxituar nga ana e policisë dhe i shproporcionuar në krahasim me një status në fb. Një arrestim i tillë do të ishte absurd në çdo vend demokratik. Jam i bindur se vajza duhet të lirohet menjëherë”, tha Dom Gjergj Meta.
Por një mendim krejt ndryshe nga Dom Gjergj Meta për këtë rast ndan Delina Fico. Sipas saj, Shqipëria po ndjek shembullin e shtetit të New York-ut në shtator të 2011, i cili po ashtu paralajmëroi dënime me burg për këdo që përhap lajme të rreme.
“Në 12 shtator, një ditë pas 11 shtatorit 2001, shteti i Nju Jorkut shpalli se do të dënonte me burg ata që përhapnin alarme të rrema. E di, sepse jetoja e punoja në Manhattan në atë kohë. Përhapja e panikut mund të sjellë pasoja vdekje-prurëse”, u shpreh Delina Fico në rrjetet sociale.
Pas kundërpërgjigjes së ish-gruas së Çuçit, Dom Gjergj Meta ka preferuar të heshtë për të mos vijuar më tej debatin. Por ka nga ata qytetarë që shfaqen të revoltuar me Delina Ficon.
Kujtojmë që e reja Xhulia Aliaj u arrestua pas paralajmërimeve të kryeministrit Edi Rama se do të ndëshkonte këdo që përhap panik dhe lajme të rreme në rrjetet sociale. Në fakt, Aliaj kishte shpërndarë në “Facebook” një shkrim të një gazete të Vatikanit dhe pas tij kërkonte nga qeveria që të vlerësonte gjendjen e depozitave me naftë dhe gaz.
(M. I./ Faxweb.al)
Discussion about this post