Avokatja e Popullit Erinda Ballanca e ftuar në ‘Fax News’ ka folur edhe për protestën e Kukësit dhe problemet që ka konstatuar institucioni i Avokatit të Popullit për këtë rast.
Erinda Ballanca deklaroi se është bërë një raport i detajuar për këtë ngjarje dhe institucioni që drejton ka përshkruar në raport çdo detaj.
Ajo deklaroi se në lidhje me çështjet e tubimit dhe protestave policia e Kukësit nuk ka zbatuar me përpikmëri ligjin pasi organizatorëve të protestës u është kthyer përgjigje me vonesë.
“Ligji nuk ka ndryshuar në shumë vite dhe nuk thotë se qytetarët duhet të marrin leje. Ligji thotë se duhet njoftuar policia në momentin e bërjes së protestës duke i bërë me dije disa elementë, në mënyrë që policia të garantojë të drejtën e protestës, por fakti që drejtori i policisë së Kukësit ka kthyer një përgjigije tej afateve ligjore dhe ka thënë se nuk miratonte lejen, në gjykimin tonë është në shkelje të kompetencave që ai ka sepse nuk e ka këtë kompetencë”, u shpreh ajo.
E pyetur nëse ishte shkelur ligji pasi arrestimet e kuksianëve ishin bërë natën, Ballanca deklaroi se nuk është shkelur ligji pasi ndalohet kontrolli i banesës dhe jo arrestimi i personave.
“Institucioni i Avokatit të Popullit nuk konsideron arrestimin gjatë orëve të natëes si të paligjshëm, sepse ligji nuk e ndalon. Nuk ka asnjë dispozitë ligjore që të ndalohet arrestimi, gjatë këtyre orëve, ajo që ndalohet, përjashtimisht mund të lejohet, është kontrolli i banesës nga ora 10 e darkës deri në 7 të mëngjesit. Ne nuk kemi pasur kontrolle banese. Ne kemi kërkuar që të mos ketë arrestime gjatë natës pavarësisht se nuk e ndalon ligji në mënyrë që të mos krijohet gjendje terrori. Arrestimet janë kryer me urdhër të Prokurorisë por kërkesa nuk është e argumentuar”, deklaroi Erinda Ballanca.
Avokatja e Popullit deklaroi se ndonëse këta qytetarë janë ndaluar bazë ligjit nuk është zbatuar procedura pasi nuk i kanë dërguar për vlerësim në gjykatë urdhrat e tyre të ndalimit brenda afatit 48 orëve të parashikuar nga ligji duke shkelur të drejtat të njeriut.
“Kjo është një shkelje shmë e rëndë e të drejtave të njeriut”, u shpreh ajo ndër të tjera. (B.H/Faxweb)
Discussion about this post