Policia e Korçës ka arrestuar 3 persona të tjerë për falsifikim dokumentesh në kuadër të operacionit “Falsifikuesit”. Të arrestuarit përdornin pasaporta serbe dhe shqiptare për të ndihmuar që të kalonin kufirin persona të ndryshëm. Të arrestuarit Ilia Çipo, Lefter Bardho dhe Marsel Miço akuzohen për “Shpërdorim Detyre” dhe “Falsifikim të Dokumentave”. Arrestimi i tyre u krye në pikën Doganore të Kapshticës në bazë të urdhrit të Prokurorisë dhe vendimit të Gjykatës bazuar në një punë hetimore. 47-vjeçari Lefter Bardho është punonjës i policisë Korçë.
Detaje:
Policia Kufitare e Korçës dhe SHÇBA arrestuan 3 persona, njëri prej të cilëve punonjës i policisë, në kuadër të operacionit të koduar “Falsifikuesit”. Ata akuzohen për “Dhënie ndihme për kalim të paligjshëm të kufijve”, “Falsifikim të dokumentave” dhe “Shpërdorim të detyrës”. Arrestimi i tyre u krye në Pikën e Kalimit Kufitar të Kapshticës, në bazë të urdhrit të Prokurorisë dhe vendimit të Gjykatës, bazuar në një punë hetimore në bashkëpunim mes organeve ligjzbatuese.
Shtetasit e arrestuar në flagrancë janë:
– Marsel Miço, 38 vjeç, banues në Korçë
– Ilia Çipi, 46 vjeç, banues në Korçë, mbi dyshimet për kryerjen e veprave penale të “Falsifikimit të vulave, stampave ose formularëve” dhe të “Ndihmës për kalim të paligjshëm të kufijve”.
SHÇBA e Korçës ka vënë në pranga punonjësin e Policisë:
– Lefter Bardho, 47 vjeç, banues në Pogradec, me detyrë kontrollor në PKK Kapshticë, për akuzën e “Shpërdorimit të detyrës”.
Shtetasit e arrestuar, në bashkëpunim me njëri-tjetrin kanë ndihmuar disa persona për të kaluar në mënyrë të paligjshme kufirin, duke përdorur pasaporta shqiptare dhe serbe si dhe në bazë të ngjashmërisë fizike, në Pikën e Kalimit Kufitar të Kapshticës.
Gjatë këtij operacioni janë sekuestruar në cilësinë e provës materiale:
– 9 pasaporta biometrike shqiptare.
– 1 pasaportë biometrike serbe.
– 4 aparate telefoni celular.
– 2 automjete “Mercedes benz” me targa AA748OG dhe AA361NY. Materialet procedurale i janë përcjellë Prokurorisë për ndjekje të mëtejshme dhe për zbulimin e lidhjeve të mundshme këtij grupi kriminal. (J.V/Shuplaka)
Discussion about this post