Policia e Tiranës ka arrestuar ish- banorin e Big Brother-it nën akuzën për mashtrim. Bëhet fjalë për Elton Tozaj i cili prezantohej si punonjës i bashkisë apo i Ministrisë së Brendshme dhe u premtonte njerëzve kredi me norma të buta interesi duke u zhvatur atyre shuma të konsiderueshme parash.
Tozaj rrezikon të dënohet me 8 vjet burg për mashtrime ndaj disa personave dhe falsifikim dokumentesh, raporton Top Channel. Për të pritet vendimi i gjykatës.
Prokuroria ka ngritur akuza ndaj tij se në të paktën në tre raste u ka marrë viktimave të tij nga 300 mijë deri në 650 mijë lekë të reja, pasi i kishte mashtruar se do t’i fuste në listën e personave që përfitonin kredi të buta nga bashkia.
Para viktimave ai paraqitej si punonjës i bashkisë ose i Ministrisë së Brendshme duke iu paraqitur atyre dokumente që i falsifikonte me firmën e ministrit Saimir Tahiri, ose të titullarëve të tjerë të lartë.
Një rast mashtrimi që ai ka kryer është kur një biznesmen i premtoi se do ta rregullonte që të merrte me qera “Vilën 31” në zonën e ish-Bllokut.
Për këtë mashtrim Tozaj ka marrë shumën prej 7 mijë dollarësh dhe 5 mijë eurosh, ndërsa çimimi i qerasë do të ishte 3 dollarë për m2.
Elton Tozaj është gazetar dhe ka qenë edhe pjesë e Big Brother-it. I pandehuri ka qenë i dënuar edhe njëherë më parë për të njëtën akuzë pasi mashtronte personat e interesuar për t’u pajisur me dëshminë e taksistit dhe u merrte atyre shuma që varionin nga 30 mijë deri në 50 mijë lekë të reja.
Discussion about this post