Policia ka vënë në pranga Jetmir Llanin, një person me precedentë të meparshem penalë, i dyshuar për vendosje gjobash ndaj bizneseve në zonën e Lezhës. Arrestimi i tij vjen pas një periudhe monitorimi nga autoritetet, të cilat kanë grumbulluar prova që e lidhin me veprimtari kriminale.
Jetmir Llani nuk është një emër i panjohur për drejtësinë. Ai ka vuajtur një dënim të gjatë me burg për vrasje, pasi ekzekutoi një person në shenjë hakmarrjeje për vrasjen e djalit të tij 9-vjeçar, Indrit Llani. Ngjarja tragjike që përfshiu familjen e tij ndodhi më 5 qershor, kur Indrit Llani u vra gjatë një përplasjeje mes familjeve Llani dhe Shkreta.
Sipas dosjes hetimore,, Indriti po udhëtonte me makinën familjare së bashku me vëllanë, kushërirën, nënën dhe xhaxhain e tij, kur u sulmuan nga vëllezërit Altin dhe Vladimir Shkreta. Ata hapën zjarr me breshëri automatiku, duke vrarë fëmijën dhe plagosur të vëllanë e tij. Policia arrestoi autorët brenda pak ditësh, por konflikti midis dy familjeve nuk përfundoi këtu.
Më 19 korrik të po atij viti, në rrugën Hoxha Tahsim në Tiranë, 71-vjeçari Mark Shkreta, babai i Altin dhe Vladimir Shkretës, u ekzekutua me armë zjarri. Autoritetet identifikuan Jetmir Llanin si të dyshuarin kryesor për këtë vrasje, ndërsa më pas ai dhe vëllai i tij, Muharrem Llani, u dënuan me nga 25 vite burgim. Megjithatë, pas apelimit të çështjes, dënimi i Jetmir Llanit u ul dhe ai fitoi lirinë disa muaj më parë.
Përveç ngjarjeve të mësipërme, Jetmir Llani ishte gjithashtu i dyshuar për një tjetër krim të rëndë – atentatin në fshatin Shpërdhet të Fushë Mamurrasit në nëntor 2012. Objektivi i sulmit ishin Gentian dhe Emanuel Shkreta, djemtë e Mark Shkretës. Atentati rezultoi fatal për Gentian Shkretën, i cili humbi jetën nga plumbat.
Duke pasur parasysh të kaluarën kriminale të Llanit dhe dyshimet mbi aktivitetin e tij aktual në Lezhë, policia po vijon hetimet për të identifikuar bashkëpunëtorët e tij dhe çdo veprimtari të mëtejshme kriminale.
