Arrestohet sërish Elidon Alla, 26 vjeçari nga Bulqiza i njohur ndryshe dhe si “hajduti serial i 11 shtëpive”.
Mësohet se i riu ishte i dënuar për këtë vepër kriminale, ndërsa kishte marrë leje nga burgu, por në mbarim të saj Alla nuk është kthyer më në burg, por ka zgjedhur të arratiset nga shtëpia.
Pasi shkeli lejen e “Qëndrimit të përkohshëm në shtëpi”, policia është vënë në kërkim dhe e ka prangosur në Tiranë, aty ku fshihej prej disa ditësh.
Njoftimi i Policisë:
Shërbimet e Komisariatit të Policisë Bulqizë, në bashkëpunim me shërbimet e Komisariatit Nr. 4 Tiranë, u bë e mundur kapja dhe ndalimi i shtetasit të shpallur në kërkim:
Elidon Alla, 26 vjeç, banues në Bulqizë, i dënuar më parë për vjedhje.
Gjatë kontrolleve të ushtruara nga shërbimet e Policisë Bulqizë, ky shtetas nuk është gjetur në banesë, duke shkelur kështu Aktin Normativ “Për qëndrimin e përkohshëm në shtëpi të të dënuarve”, pasi për këtë shtetas ishte miratuar leja e veçantë “Qëndrim i përkohshëm në shtëpi”, për periudhën kohore 4 prill-1 korrik 2020.
Pas mbarimit të lejes së përkohshme, ky shtetas ishte larguar nga banesa e babait të tij në Bulqizë dhe fshihej në Tiranë, duke mos u kthyer në vendin e vuajtjes së dënimit sipas afateve të lejes së përkohshme, pasi Gjykata e Rrethit Gjyqësor Tiranë e ka dënuar me 2 vite e 4 muaj e burg, për veprën penale “Vjedhja”.
Pas marrjes së informacionit për vendndodhjen e këtij shtetasi, u organizuan shërbimet dhe në bashkëpunim me shërbimet e Komisariatit të Policisë Nr. 4 në Tiranë u bë kapja dhe ndalimi i tij.
Ndërkohë materialet i kaluan Prokurorisë Dibër, për veprën penale “Largim i të burgosurit nga vendi i qëndrimit”.
Discussion about this post