Më në fund është arritur marrëveshja për murin në Mitrovicë. Përfaqësuesit e Qeverisë së Kosovës dhe kryetari i Mitrovicës së Veriut, Goran Rakiç, janë pajtuar që të zgjidhet kjo çështje shumë e diskutuar. Këtë e ka bërë të ditur ministri i Planifikimit Hapësinor, Ferat Shala, përmes një komunikate të përbashkët të cilët e publikuan në rrjetin social Facebook edhe zyrtarë të tjerë të Qeverisë së Republikës së Kosovës.
“Gjatë ditëve të fundit dhe nën lehtësimin e Zyrës së BE-së si dhe të Ambasadës së SHBA-ve, ne, palët e përbëra nga ministri i Mjedisit dhe Planifikimit Hapësinor, Ferat Shala dhe kryetari i Mitrovicës së Veriut, Goran Rakiq, jemi pajtuar që të zgjidhim çështjen e cila lidhet me ndërtimin e murit në Mitrovicën Veriore”, thuhet në komunikatë.
Në komunikatën në fjalë nuk është bërë e ditur konkretisht nëse muri do të rrëzohet, por është thënë se ‘zgjidhja do të ulë tensionet në veriun e Kosovës dhe do të ndihmojë lirinë e lëvizjes’.
“Gjatë ditëve në vijim, ne do të njoftojmë publikun me planin e rishikuar për zonën e këmbësorëve, e cila buron nga marrëveshja në kuadër të dialogut të BE-së, që ka të bëjë me projektin e BE-së për urën”, thuhet ndër të tjera në njoftimin e Qeverisë. (E.K/SHUPLAKA)
