Trajneri spanjoll Unai Emery ka vendosur që të largojë disa nga yjet e skuadrës së Arsenal për të rritur buxhetin që klubi i ka vënë në dispozicion për merkaton e verës. Sipas “Metro”, skuadra e Arsenal ka vetëm 45 milionë stërlina buxhet për të shpenzuar në merkato, një shumë qesharake për një klub që për të tretin vit me radhë do të luajë në Europa League.
“Metro” sqaron se pas humbjes së finales së Europa League, trajneri ka deklaruar se do të ketë shumë largime, që do të rritin disi buxhetin e skuadrës në merkaton e verës dhe rinovojë grupin. “Ideja jonë është që t’u japim më shumë hapësira lojtarëve të rinj që kemi afruar kohët e fundit. Ndoshta disa lojtarë do të largohen, por ky nuk është momenti për të folur për këtë gjë”, tha Emery.
“Kemi mundësi që shumë të rinj të aktivizohen më shpesh. Ata kanë marrë një përvojë tashmë me sezonin që sapo u mbyll dhe unë e shoh me optimizëm të ardhmen e tyre, pasi janë në rrugën e duhur. Jem krenar me punën që kemi bërë me këta të rinj, që tashmë do të kenë shansin të luajnë më shumë. Ne nuk mund të vazhdojmë sezonin tjetër me të njëjtin grup, kjo është e sigurtë”, tha Emery.
Nacho Monreal, Mesut Ozil, Laurent Koschielny, Stepan Lichtsteiner dhe Clark Jenkinson konfirmohet se do të largohen nga Arsenal në merkaton e verës.
