Janë mbajtur sot homazhet në Muzeun Kombëtar në nderim të shkrimtarit dhe akademikut shqiptar Moikom Zeqo, i cili u nda nga jeta 5 ditë më parë. Pjesë e këtyre homazheve kanë qenë dhe politikanë dhe drejtues të institucioneve më të larta në vendin tonë, të cilët nderuan lart figurën e Moikom Zeqos.
Një prej mikeshave të tij më të afërta ka qenë dhe ish-deputetja Arta Dade, e cila e ka kujtuar të ndjerin me fjalët më të veçanta. Dade shprehet se me Zeqon nuk e ka lidhur vetëm politika, por mënyra sesi akademiku reflektonte për të gjitha zhvillimet e rëndësishme në vend, duke qenë mbi të gjitha një qytetar i angazhuar.
‘Ikja e një miku lë një zbrazëti që do kohë të mbushet, do të na mungojë në bisedat e ngrohta dhe në analizat e tij të thella. Nuk ishte një politikan mirëfilli, i kalonte caqet e partive, prandaj ka qenë një shembull sesi duhet të bëhen gjërat në politikë.
Të gjithë brezat që do të vijnë do ta njohin përmes veprës së tij. Nuk duhet të hidhërohemi që ka ikur, por duhet të gëzohemi që e kemi pasur. Kjo shprehje për Moikomin vlen edhe sot, kur njerëzit nuk kanë rreshtur së ardhur për ta respektuar, pavarësisht kushteve të pandemisë”, u shpreh mes emocioneve Dade.
Discussion about this post