Prokurorja e Përgjithshme e Përkohshme, Arta Marku ka vizituar ditën e sotme qytetin e Vlorës për të bërë bilancin vjetor të punës së Prokurorisë së këtij rrethi.
Gjatë fjalës së saj Marku është shprehur se Vlora ka një rekord ngjarjesh kriminale, por ajo që është më e çuditshmja është se një pjesë e madhe e tyre jo vetëm që janë të pazbardhura por krijojnë gjithashtu dhe apati tek organet ligjzbatuese.
“Ngjarjet kanë qënë nga më të dhunshmet në Vlorë dhe një pjesë e madhe e tyre janë të pazbuluara, me keqardhje më duhet të pranoj se kam vënë re një apati të Prokurorisë dhe Policisë së Shtetit , megjithatë unë nuk jam sot për të gjykuar punen e institucioneve të tjera.”
Në vijimësi të fjalës së saj Prokuorja Marku u ka bërë një kërkesë të drejtëpërdrejtë prokurorëve për të punuar me përkushtim dhe që bashkëpunimi me institucionet të shihet me përparsi.
“Asnjë institucion nuk mund të punojë i vetëm, bashkëpunimi është çelsi i suksesit dhe këtë mund ta bëni mjafton të keni vullnet. Unë kërkoj prej jush të mos intimidoheni dhe të punoni me përkushtim dhe ndershmëri.”
Duke e krahasuar Vlorën me qytetet e tjera Marku është shprehur, “niveli i penalitetit është më i lartë në Vlorë dhe më i ulët në Fier, Lushnje dhe Berat”.
Pas inspektimit në Prokurorinë e qytetit të Vlorës, Arta Marku nesër do të jetë në Gjirokastër për të njëjtën arsye.
Discussion about this post