Artan Cuku, Drejtori i hekurt i Vlorës i cili u qëllua për vdekje mbrëmjen e sotme, rreth 50 metra larg shtëpisë së tij, ishte nga të paktët drejtues që e bëri “zap” krimin.
Fillimisht Cuku shkoi si nëndrejtor në Vlorë në kohën kur drejtimi i Policisë bëhej nga Vehbi Bushati. Më pas ai u transferua për në Berat si shef komisariati, më vonë edhe në qytete të tjera.
Angazhimi i fortë dhe aksionet si nëndrejtor shpeshherë bënin që të ktheheshin në qendër të vëmendjes operacionet e kryera.
Më pas rikthimi si drejtor në Vlorë bëri që të kishte më shumë në dorë përsa i përket operacioneve dhe aksioneve të cilat gati në të gjitha rastet i drejtonte vetë.
Mungesa e besimit që kishin qytetarët te policia bëri që të vendoste numrin personal kudo 0684111021, ku brenda një kohe shumë të shkurtër nëpërmjet këtij sistemi u arrit të zbardheshin shumë ngjarje. Emri i Cukut bëri që numri i krimeve të binte në qytet dhe të zbardheshin shumë ngjarje të rënda duke nisur nga grabitje bankash dhe deri te vrasje.
Cuku kishte çdo gjë në kontroll në sektorin policor në kuptimin që edhe natën kryente kontrolle të befasishme sëbashku me shoferin duke marrë dhe kosto personale, çka i dha zemër dhe efektivëve të policisë të kryenin punën e tyre.
“Shuplaka” mëson se për shkak të operacioneve delikate që kryente, ai shumicën e kohës e kalonte me komisariat madje dhe aty flinte në një dhomë ngjitur me zyrën.
Krimi i druhej drejtuesit të hekurt duke bërë që të zhdukeshin dhe ata që mbanin armë me vete nëpër çanta. Ai priste dhe përcillte vetë çdo shqetësim që kishin qytetarë ndërkohë që efektivët druheshin sikur edhe nga ndonjë korrupsion rrugor për shkak të frikës së dërgimit të sms.
Pas largimit të Cukut nga Vlora, shumë qytetarë e ndjenë mungesën dhe do vazhdojnë ta ndjejnë pasi sipas tyre “Vlorës vështirë t’i vijë një drejtor si ai”./Shuplaka
Discussion about this post