Akademiku i njohur Artan Fuga thotë se palët politike duhet të ulen në negociata, pasi në të kundërt shteti mund të futet në kaos duke patur parasysh situatën politike në vend.
Në një intervistë për gazetën “Shekulli”, Fuga shprehet se është gati të hartojë platformën për një qeveri teknike, nëse aktorët politikë e kërkojnë.
“Tani të vijmë te qeveria teknike. Edhe sikur të mos kishte para droge ose manipulime. Sot në zonat elektorale të gjitha pushtetet janë në duart e militantëve socialistë. Taksat, drejtoritë arsimore, shëndetësore, komisariatet e policisë, prefektët, kryetarët e bashkive. Mendoni ju se një qytetar i thjeshtë, ta zëmë që i punon gruaja si pastruese në muzeun e Gjirokastrës, do ta kishte të lehtë të shkonte në mitingun e opozitës, nëse atje ta zëmë nga qeveria do të kandidonte ministrja e Kulturës? Kuptohemi sepse ata nëpunës nuk janë punonjës të vërtetë civilë, por militantë politikë, që e dinë se një ndryshim pushteti drejtorët e muzeve i kthen në pastrues muzesh!
Pra opozita ka të drejtë të veçojë fuqinë e qeverisë nga procesi elektoral. Por, një qeveri teknike duhet të shihet me kujdes. Duket si e papranueshme nga të dy palët, por në thelb ka shumë forma dhe nuanca të qeverisë teknike që me urtësi të dy palët mund ta realizojnë. Nuk është ndonjë gjë që nuk bëhet. Ka mundësi për një hapësirë të përbashkët dialogu dhe vendim-marrje pa anashkaluar opozitën që kërkon me të drejtë qeveri teknike, por edhe pa e detyruar partinë socialiste në pushtet që bashkë me qeverinë teknike të pranojë edhe humbjen në tavolinë de facto të zgjedhjeve.
Modestish e them se nëse duhet unë jam gati të përpunoj një platformë me shumë zgjedhje alternative për këtë qeveri teknike po qe se aktorët politikë e kërkojnë. Sigurisht jo vetëm, por në bashkëpunim me kolegë, me të cilët kemi infrastrukturat teknologjike, shkencore dhe metodologjike për ta bërë këtë gjë. Jemi gati! Shqipëria duhet nxjerrë nga gremina ku po bie.”, shprehet pedagogu i gazetarisë dhe i filozofisë.
Ndër të tjera, Fuga flet edhe mbi vizitën e zyrtares së lartë të BE-së, Federica Mogherini. Sipas tij, palët politike nuk ishin të qartë me kërkesat e tyre.
“Nuk kuptova as se çfarë ofruan dhe as se çfarë kundër propozuan aleatët në opozitë. Ishte më shumë një si furtunë në kushtet e pranisë të zonjës Mogherini në Tiranë. Nuk u kuptua se çfarë propozuan aleatët në qeverisje, sepse unë nuk pashë ndonjë tekst zyrtar deklarate të botohet e zezë mbi të bardhë, por edhe nga ana e opozitës sipas meje atë pasdite pati një lloj shpërqendrimi sepse flitej sa për qeveri teknike, aq për qeveri me bazë të gjerë sa për qeveri të qëllimeve të mira, etj. Por, këto janë zgjidhje politike të ndryshme.”, shton Fuga. (D.D/Shuplaka)
Discussion about this post