Akademiku Artan Fuga ka reaguar për debatin prej dy ditësh tashmë mes ministres së Arsimit, Lindita Nikolla dhe deputetes së LSI-së, Kejdi Mehmetaj.
Duke vënë theksin tek “paçavurja e arsimit të lartë”, ai ndalet tek akuzat e ndërsjella të dy politikaneve, ku Nikolla akuzon deputeten e LSI-së që nuk ka lidhje me ligjin, ndërsa kjo e fundit i ndal akuzat tek diploma e ministres në një universitet privat ose të blerë.
Nisur nga këto replika flakë për flakë, akademiku Fuga ngre shqetësimin për gjendjen në të cilën ka arritur arsimi shqiptar, degradimin e gjendjes.
Reagimi i Artan Fugës:
Ngjarje e rëndë që tregon se me çfarë ligji të arësimit të lartë kemi të bëjmë!
————
Bashkë me kolegë të tjerë kemi vite që denoncojmë ligjin e mbrapshtë dhe pacavure të arsimit të lartë!
Sot pati një debat.
Ish-ministrja e arsimit Nikolla akuzoi deputeten e re të LSI, që nuk ka lidhje fare me atë ligj, duke i treguar se partia e saj kishte pasur lidhje me universitete private të mbyllura si jashtë standartit.
Dhe se ministrinë e kanë drejtuar të dyja forcat politike.
Kurse deputetja e re e LSI ia ktheu ish-ministres flakë për flakë duke e akuzuar se ka një diplomë në një universitet privat të dhuruar ose të blerë!
Dhe e akuzoi se ky ligj është bërë nga rrjete kilenteliste!
——————-
Të rinj dhe të reja!
Prindër!
E imagjinoni se në çfarë degradimi ka rënë gjendja?
E mendoni se cila është rrënja e rezistencës sonë trevjeçare, të cilën shërbëtorët e mediatizuar të shitësve të diplomave e quajnë reagim inatçor?
E mendoni se në duart e kujt ka rënë edukimi dhe arsimimi i rinisë shqiptare!
Besoj se edhe më naivi e kupton tani se çfarë është ligji në fjalë dhe çfarë fshihet pas tij!
