I ftuar në emisionin “!Kjo javë” në News 24, gazetari i njohur i kronikës Artan Hoxha, ka komentuar caktimin e masës së sigurisë “arrest me burg” në ngarkim të Klemend Balilit, ose siç njihet ndryshe “Eskobari i Ballkanit”.
Sipas tij, deri tani janë zhvilluar katër operacione për arrestimin e tij, por asnjëri nuk ka rezultuar i suksesshëm.
“Operacioni i parë për arrestimin e tij është bërë në lokalin e tij, operacioni i dytë në tetor, ku Balili s’u gjet në makinë. Operacioni i tretë në një ndeshje të Delvinës. Operacioni i katërt është ai që u zhvillua sot. Operacionet janë bërë të gjitha nga Tirana”, tha Hoxha.
Sipas gazetarit, “Klemend Balili ndodhet në Shqipëri dhe jo në Greqi dhe se grupi i tij ka bërë miliona euro”.
Artan Hoxha shtoi se Balili nuk është një njeri i zakonshëm. Ai i ka shpëtuar gjithmonë drejtësisë pasi ka edhe background politik.
Me kërkesë të prokurorit Ened Nakuçi, Gjykata e Krimeve të Rënda i ka caktuar masën e sigurisë ”arrest me burg” në mungesë Klemend Balilit, me akuzën e trafikut të drogës, në kuadër të grupit të strukturuar kriminal drejt Greqisë dhe Italisë dhe më pas në vendet e Bashkimit Europian. /Shuplaka/
