Gazetari i kronikës Artan Hoxha i ftuar mbrëmjen e sotme në emisionin ‘Opinion’ foli në lidhje me ekzekutimin e ishpolicit Santiago Malko.
Hoxha u shpreh se Malko është ekzekutuar nga vrasës profesionistë të cilët janë shumë mirë të paguar. Madje Hoxha tregoi se vrasësi mund të jetë paguar 300 mijë euro.
“Ekzekutorët që kanë qëlluar Santiago Malko, janë po ata që kanë qëlluan mbi Edison Harizaj. Janë vrasës profesionistë, me atë jetojnë. Ai që kryen një vrasje, paguhet për atë. Në rastin konkret, ky është një atentat dhe që dyshohet të jetë paguar 300 mijë euro, duhej me se s’bën të vritej. Është tentuar dhe në prill, por policia ka ndërhyrë”, tha gazetari Hoxha.
Sipas tij për atentatin është “punuar” për shumë kohë, ndërsa thekson se autorët kanë lëvizur me tre automjete.
Ndërkohë gazetarja e kronikës Dorjana Bezat tha se të shtënat u dëgjuan në gjithë kryeqytetin. Sipas saj atentatorët kanë qëlluar në lëvizje dhe ka pasur një skemë krimi të zgjeruar.
“Kur shkuam ne në vendngjarje aty ishte dhe automjeti i viktimës, një skemë mjaft e rëndë ishin mbërritja e familjareve të tij. Edhe policia e pati të vështirë menaxhimin e kësaj situate.”- u shpreh Hoxha.
(M.Q/Faxweb.al)
