Gazetari investigativ Artan Hoxha, rikthen edhe njëherë për diskutim vrasjen e Elton Çiços. I ftuar në emisionin “Kjo Javë”, gazetari tregon se hakmarrja mes dy grupeve kriminale Çiço-Aliaj mund të vazhdojë, edhe pas arrestimit të Renato Milloshit i cili pak ditë më parë u vetëdorëzua në polici.
Sipas Hoxhës, këto dy grupe janë aq të fuqishme dhe kanë para pafund që i përdorin për tu hakmarrë, madje kanë edhe informatorë të SHISH, polici e Prokurori e dinë me saktësi lëvizjet e rivalëve.
Vrasja e Elton Çiços ka ndodhur në një lokal në ish-bllok në 1 maj të 2016-ës. Renato Milloshi ishte pronari i Fordit që dërgoi Jani Aliajn në vendngjarje, i cili akuzohet si autor i vrasjes dhe që nga maji i 2016-ës është në kërkim.
Elton Çiço u ekzekutua brenda Bar “De Niros” në ish-bllok, ndërsa ai ishte ulur në tavolinë me disa miq të tij, njëri oficer policie tjetri mjek dhe një gazetar kronike. Makina e Milloshit u sekuestrua disa ditë pas krimit në një parking në zonën e ish-Bllokut.
Në dëshminë e tij në polici, Milloshi ka mohuar të ketë dijeni se ku ndodhet. Ai shprehet se nuk ka kontakuar me të.
“Pas ngjarjes jam fshehur në banesa të ndryshme, në periferi të Tiranës. Ishin familjarët që më bindën të dorëzohem. Me Jani Aliaj nuk kam kontakuar, nuk e di ku ndodhet. Kam dëgjuar që ai ka ikur jashtë vendit.”, mësohet të ketë thënë Renato Milloshi në polici. (D.D/Shuplaka)
Discussion about this post