Artikulli i “New Europe” për lidhjet e kanabisit me zgjedhjet, reagon Berisha: Damkosje e Kanabistanit në Bruksel!

Pas lajmit të publikuar nga gazeta “New Europe” për lidhjen mes kanabisit, korrupsionit dhe votave, reagon ish-kryeministri Sali Berisha.

Demokrati e cilësoi artikullin me titull: “Shqipëria nga Kanabis te Korrupsioni”, si një damkosje të re të Shqipërisë në Bruksel, apo Kanabistan, siç e quan ai.

Gazeta me bazë në Bruksel, e cila publikohet në gjuhën angleze, shkruan në artikullin e sotëm për Shqipërinë, se paratë e fituara nga trafikimi i kanabisit, do të përdoren për financimin e zgjedhjeve të ardhshme parlamentare.

”Ndërkohë, situata e drogës në Shqipëri ka marrë shumë vëmendjen e medias ndërkombëtare. Për momentin, Shërbimi Botëror i BBC-së njoftoi se vlera vjetore e drogës së prodhuar në Shqipëri është vlerësuar në 5 miliardë euro. ”Rai 1”, ”Deutsche Welle”, ”Corriere della Sera”, ”CNN Greqia”, ”Frontex”, ”La Republica” dhe ”Huffington Post” kanë raportuar edhe për kultivimin e kanabisit në Shqipëri.

Së fundmi mediet pohojnë se miliarda euro të gjeneruara nga trafikimi do të financojnë zgjedhjet e ardhshme parlamentare në qershor. Më keq akoma janë raportet që eksponentë të grupeve të krimit të organizuar kanë lidhje të forta politike me qeverinë dhe kanë marrë garanci se aktivitetet e tyre nuk do të jetë në shënjestër – në këmbim të financimit të fushatës zgjedhore”, kështu shkruan këtë të hënë gazeta ”Neë Europe”.

Më tej, në artikull përmendet edhe shkarkimi i ish-ministrit të Drejtësisë Ylli Manjani, pikërisht pas ndërhyrjeve të tij të vazhdueshme për kultivimin e kanabisit.. (D.D/Shuplaka)