Asgjësohen me shkulje e djegie 143 rrënjë kanabis në Vlorë, asnjë i arrestuar

143 rrënjë kanabis janë gjetur dhe asgjësuar nga policia e Vlorës, në fshatrat Poro dhe Mërtiraj. 48 rrënjë prej atyre të asgjësuara në total, dyshohet se kanë mbirë vetë sipas policisë në njoftimin e saj. 

Policia ka nisur hetimin për zbulimin dhe kapjen e autorëve.

Detaje të Policisë së Vlorës:

Policia ka asgjësuar 143 rrënjë bimë narkotike të llojit Cannabis Sattiva!

Më datë 25.05.2017, në vijim të kontrollit të territorit kundër kultivimit të bimëve narkotike, ka rezultuar se:

– Gjatë kontrollit të ushtruar në zonën e Novoselës, shërbimet kanë konstatuar 95 bimë narkotike të llojit Cannabis Sattiva, të mbjella në vendin e quajtur “Vërri e Poros”, fshati Poro (pronë publike).

– Gjatë kontrollit të ushtruar në fshatin Mërtiraj, pranë vendit të quajtur “Përroi i Kaminave”, u gjet një parcelë me 48 bimë narkotike të llojit Cannabis Sattiva, të cilat dyshohet se kanë mbirë vetë përgjatë shtratit të përroit. Policia bëri asgjësimin e tyre me shkulje dhe djegie. Vazhdojnë hetimet për zbulimin dhe kapjen e autorëve.

(XH.A/SHUPLAKA)