Në një kohë që më shumë se 70 persona janë paraqitur në QSUT pas helmimit ditën e djeshme në Mitingun e Partisë Demokratike, ende nuk ka një reagim nga kryeministri Rama.
Ai ka zgjedhur sërish një fotomontazh të kreut të demokratëve Lulzim Basha.
Pas komentimit gjerë e gjatë të listave kreu i qeverisë nuk duket të ndalet me ironinë e tij. Sot ai ka qenë në qytetin e elbasanit ku ka vijuar me takimet e tij elektorale për zgjedhjet e 25 Qershorit.
Nga ana tjetër për shkak të situatës së tij shëndetësore Basha ka anuluar takimet e parashikuara me mbështetësit e PD-së në Lushnje.
Pas helmimit të qytetarëve në protestën e opozitës ka reaguar dhe QSUT. Në njoftimin e saj thuhet se janë paraqitur në spital 76 persona, 5 prej të cilëve mbahen akoma nën vëzhgimin e mjekëve.
Njoftim për shtyp
Qendra Spitalore Universitare “Nënë Tereza” Tiranë, njofton se në Urgjencën e Spitalit Francez nga orët e para të mëngjesit të ditës së dielë deri në orën 11.00, janë paraqitur 76 qytetarë të cilët paraqisnin ankesat në vijim: skuqje të fytyrës dhe syve, lotim, kruarje të syve dhe rrufë.
Të gjithë qytetarët referojnë se gjatë mbrëmjes së djeshme kanë marrë pjesë në aktivitetin e Partisë Demokratike. Drejtoria e QSUT në bashkëpunim të ngushtë me Ministrinë e Shëndetësisë dhe stafin mjekësor të Shërbimeve të QSUT, morën menjëherë masat për trajtimin e këtyre pacientëve. Aktualisht, 5 pacientë po mbahen në observim në pavionin e Okulistikës nga një ekip multidisiplinar mjekësh specialistë. Gjendja e tyre shëndetësore paraqitet e mirë, pa komplikacione të rëndësishme. Drejtoria e QSUT ka vënë në dispozicion të Institutit të Mjeksisë Ligjore të gjithë dokumentacionin e kërkuar për të sqaruar shkaqet e këtyre simptomave.
(E.K/SHUPLAKA)
Discussion about this post