Në kuadër të luftës antikorrupsion, projektligji zgjeron objektin e përgjimit, përfshirë këtu: sinjalet, fotografitë, shkrimet, të dhënat audio-vizuale dhe çfarëdo informacioni që do të kalojë përmes pajisjeve të komunikimit elektronik: sjelljet, veprimet dhe bisedat e kryera në vendet private dhe publike.
Me projektligjin e ri për përgjimet parandaluese, i depozituar në Kuvendin e Shqipërisë dhe i hartuar nga ekspertët e EURALIUS dhe OPDAT, “pritet që të mos ketë asnjë kufizim”, sipas “Shqiptarja.com”. Çdo ambient që zyrtarët e dyshuar do të frekuentojnë, do të ketë pajisje përgjimi. Përfshirë këtu zyrën, lokalet e preferuara, dhomat e banesës, makinën, etj.
Kjo nismë zgjeron edhe kuptimin e termit “përgjim”, përfshirë këtu përgjimin e bisedave, videot e survejimit të fshehtë, të mjediseve private dhe publike si dhe dëgjimin e regjistrimit të fshehtë të bisedave në mjediset private dhe publike.
Vendosja e pajisjeve në funksion të efikasitetit të hetimeve, do të mundësohet nga punonjësit e Shërbimit Informativ Shtetëror, me anë të metodave dhe praktikave të tyre.
Sa i përket kohëzgjatjes së përgjimit, nisma ligjore rregullon kohëzgjatjen e vendimit për përgjimin e komunikimeve elektronike, si edhe për video survejimin e fshehtë dhe përgjimin e bisedave në mjediset publike dhe private të, cilat janë të vlefshme për një periudhë deri në tre muaj. Në çdo rast, zgjatja e afatit ose masat e reja nuk mund të jenë me tepër se tre muaj. (XH.A/SHUPLAKA)
Discussion about this post